Leikhúsmál.

Leikhúsmál 22. þáttur - Þór Tulinius, leikhúsmaður.

Gestur Leikhúsmála að þessu sinni er leikarinn, leikstjórinn og leikskáldið Þór Tulinius. Hann segir m.a. frá afa sínum og  stórleikaranum Brynjólfi Jóhannessyni.

Við fáum að heyra af leiklistarnámi Þórs bæði erlendis og hér heima. Síðast en ekki síst heyrum við af hans mörgu og fjölbreyttu verkefnum í leikhúsinu í gegnum áratugina. 

Leikhúsmál 21. þáttur - Sunneva Elfarsdóttir, hönnuður

Listaháskóli Íslands er mikilvæg stofnun fyrir mannlíf á Íslandi. Þaðan hafa komið glæstir listamenn á öllum sviðum í gegnum árin. Einn af þeim er Þ. Sunneva Elfarsdóttir hönnuður. Hún segir okkur frá listnámi sínu, fyrst við FB og síðan við LHÍ. Einnig kemur leikhúsið við sögu sem heillaði hana strax á unga aldri.

Leikhúsmál 20. þáttur - Gunnhildur Björk Elíasdóttir, leikkona á Þingeyri.

Leikstarfið á leikhúseyrinni Þingeyri hefur löngum verið gjöfult.

Ein aðalsprautan í leikstarfinu á eyrinni síðustu ár er Gunnhildur Björk Elíasdóttir. Hún segir okkur frá leiklífinu á Þingeyri og í Dýrafirði. Frá leikverki föður hennar; Blóðeitrun, og svo kemur ótal margt fleira sögulegt ,sem og skemmtilegt við sögu.

Leikhúsmál 19. þáttur - Gvendur dúllari.

Margur leikarinn er einstakur en fáir eru jafn einstakir og Guðmundur Árnason, betur þekktur sem Gvendur dúllari, enda fattaði hann upp á eigin list er hann nefndi "dúll" sem var sannlega ekkert dútl. Fjallað verður um þennan einstaka listamann sem heldur betur fetaði sínar eigin leiðir í listinni sem og tilverunni.

Leikhúsmál 18. þáttur - Oddur Björnsson.

Leikhúsmál eru að þessu sinni helguð leikhúsmanninum Oddi Björnssyni. Hann ritaði ekki aðeins einstök leikverk eins og Jóðlíf og 13. krossferðina, heldur var hann og mikilvirkur leikstjóri. Í þættinum verður fjallað um leikhúsheim Odds Björnssonar og fluttar beittar sem kómískar greinar eftir skáldið sjálft.

Leikhúsmál 17. þáttur - Leikrit á bók.

Leikrita útgáfa á bók er í aðalhlutverki Leikhúsmála að þessu sinni. Farið verður frjálslega og með leikandi hætti yfir útgáfusögu leikbókmennta á Íslandi síðustu 125 ár. Leikritin er ratað hafa á bókverk eru margvísleg allt frá örleikritum til einleikja og allt þar í millum og kring.

Leikhúsmál 16. þáttur - Leiklist á Þingeyri.

Þá er loks komið að því að við kynnum okkur sögu leikhúseyrarinnar, Þingeyri hér í Leikhúsmálum. Í þessum þætti verður leiksaga Þingeyrar og Dýrafjarðar rakin allt frá landnámi til nútímans. Við sögu koma m.a. Gísli Súrsson, Kvenfélagið Von, Skugga-Sveinn og leikritið Blóðeitrun.

Leikhúsmál 15. þáttur - Ólöf eskimói

Sviðsafn hennar var Ólöf eskimói og kom hún fram sem slík í Vesturheimi. Dubbaði sig upp sem inúíti og sagði bæði frá lífi og landi sínu; Grænlandi. Hélt rúmlega tvö þúsund fyrirlestra sem voru í raun leiksýning, einleikur. Því aldrei hafði hún til Grænlands komið. Saga hinnar íslensku Ólafar Sölvadóttur í Vesturheimi er engri lík. Það er næsta víst að svona nokkuð getur engin gert nema hafa góða leikhæfileika.

Leikhúsmál 14. þáttur - Leikhúsmaðurinn Moliére

Það má sannlega segja að hinn franski Moliére hafi verið leikhús frá toppi til táar. Hann var ekki bara leikskáld, heldur einnig leikari, leikstjóri og leikhússtjóri. Í ár eru 400 ár frá hans fæðingu og því upplagt að fræðast um þennan merka leikhúsmann.

Leikhúsmál 13. þáttur - Áhorfandinn – Hr. Gunnar Ólafsson

Það er kominn gestur í Leikhúsmál. Hr. Gunnar Ólafsson frá Kollsvík er mikill hugsjónamaður og hefur unnið mörg kraftaverkin. Hann er mikill unnandi leikhússins og segir okkur frá minnisstæðum stundum í leikhúsinu hér og þar á landinu. Einnig fáum við að heyra af sérlega áhugaverðu verkefni hans í Bolungarvík er nefnist Djúpið.